ଭୁବନେଶ୍ବର: ରାଜ୍ୟର 8ଟି ଉତ୍ପାଦକୁ ଜିଆଇ(Geographical Indication) ଟ୍ୟାଗ୍ ମିଳିଛି। ରାଜ୍ୟ କ୍ଷୁଦ୍ର, ମଧ୍ୟମ ଶିଳ୍ପ ବିଭାଗ ପକ୍ଷରୁ ସୋସିଆଲ ମିଡିଆ ‘ଏକ୍ସ’ରେ ଏହା ସଂପର୍କରେ ସୂଚନା ଦିଆଯାଇଛି। ଜିଆଇ ମାନ୍ୟତା ପାଇଥିବା ତାଲିକାରେ ରହିଛି ଓଡ଼ିଶା ଖଜୁରୀ ଗୁଡ଼(ଗଜପତି ଖଜୁରୀ ଗୁଡ଼), ଢେଙ୍କାନାଳ ମଗଜି, ମୟୂରଭଞ୍ଜ କାଇ ଚଟଣୀ, ନୟାଗଡ଼ କଣ୍ଟେଇମୁଣ୍ଡି ବାଇଗଣ, ଡଙ୍ଗରିଆ କନ୍ଧ ଏମ୍ବ୍ରୋଡରି ସାଲ, କେନ୍ଦ୍ରାପଡ଼ା ରସାବଳି, କୋରାପୁଟ କଳାଜିରା ଧାନ ଓ ଲାଞ୍ଜିଆ ସଉରାଙ୍କ ଚିତ୍ରକଳା ସ୍ଥାନ ପାଇଛି। ଏହି 8ଟି ଜିଆଇ ଟ୍ୟାଗ ସହ ଓଡ଼ିଶାକୁ ମିଳିଥିବା ଜିଆଇ ଟ୍ୟାଗ୍ ସଂଖ୍ୟା 25ରେ ପହଞ୍ଚିଛି ।
କେନ୍ଦ୍ରାପଡ଼ାର ପ୍ରସିଦ୍ଧ ରସାବଳୀକୁ ଜିଆଇ ଟ୍ୟାଗ୍ ପ୍ରଦାନ କରିବାକୁ ଦୀର୍ଘଦିନରୁ ଦାବି ହୋଇ ଆସୁଥିଲା। ଗତବର୍ଷ ଅକ୍ଟୋବର ୩ ତାରିଖରେ କେନ୍ଦ୍ରାପଡ଼ା ରସାବଳିକୁ ଜିଆଇ ଟ୍ୟାଗ୍ ମିଳିବା ନେଇ ସୂଚନା ମିଳିଛି। କେନ୍ଦ୍ରାପଡ଼ା ମିଷ୍ଟାନ୍ନ ରସାବଳି ସଂଘର ଆବେଦନକୁ ମଞ୍ଜୁରି ଦିଆଯାଇଥିଲା। ଗୁଣବତ୍ତା ଓ ମାନ ଯାଞ୍ଚ ପରେ ରସାବଳିକୁ ଜିଆଇ ମାନ୍ୟତା ଦିଆଯାଇଛି। ସେହିପରି ଓଡ଼ିଶାର ଲାଞ୍ଜିଆ ସଉରା(ଆଇଡିଆଇଟିଏଏଲ୍)ଙ୍କ ଚତ୍ରକଳାକୁ ଜିଆଇ ଟ୍ୟାଗ୍ ମିଳିବା ପରେ ରାଜ୍ୟ ଏସ୍ସିଏସ୍ଟି ବିଭାଗ ପକ୍ଷରୁ ଶୁଭେଚ୍ଛା ଜଣାଯାଇଛି।
ଓଡ଼ିଶାର ରାୟଗଡ଼ା ଜିଲ୍ଲାର ‘ଲାଞ୍ଜିଆ ସୌରା’ (ବା ‘ଲାଞ୍ଜିଆ ସାବରା/ଶବରା) ଜନଜାତିର ଚିତ୍ରକଳା ଅନ୍ତର୍ଭୁକ୍ତ। ଏହି ଚିତ୍ରଗୁଡ଼ିକ ମୂଳତଃ ଆଦିବାସୀ ଘରଗୁଡ଼ିକର ବାହ୍ୟ ଭିତ୍ତିଚିତ୍ର (କାନ୍ଥ ଚିତ୍ର) ଆକାରରେ ରହିଥାଏ । ଆଜିକାଲି ଏହି ସମ୍ପ୍ରଦାୟର ଯୁବକମାନେ କ୍ୟାନଭାସରେ ଆକ୍ରେଲିକ୍ ରଙ୍ଗର ବ୍ୟବହାର ଶିଖିଛନ୍ତି ଏବଂ ମନଛୁଆଁ କଳା ଆଣିଛନ୍ତି ଯାହା ଉଚ୍ଚସ୍ତରୀୟ ଘରୋଇ ସଜ୍ଜା ପାଇଁ ଯୋଗ୍ୟ ବିବେଚିତ ହୋଇପାରିବ ।
ଗଜପତି ଜିଲ୍ଲାର ଖଜୁରୀ ଗୁଡ଼ା (ଗୁଡ଼) ଖଜୁରୀ ଗଛର ମିଠା ରସ (ନିରା) ରୁ ମିଳୁଥିବା ଏକ ପ୍ରାକୃତିକ ମିଠା । ପାରମ୍ପରିକ ଭାବରେ ‘ପାଟଲି ଗୁର’ ନାମକ ଟ୍ରାପେଜୋଇଡାଲ ଆକାରରେ ପ୍ରସ୍ତୁତ ଗୁଡ଼ ସମ୍ପୂର୍ଣ୍ଣ ଜୈବିକ ଅଟେ । ଗାଢ଼ ବାଦାମୀ ରଙ୍ଗର, ଏହାର ଏକ ନିଆରା ସ୍ୱାଦ ରହିଛି ।
ଜିଆଇ ଟ୍ୟାଗ୍ କଣ ?
ଜିଆଇ ଟ୍ୟାଗ୍ ହେଉଛି ଏକ ସାର୍ଟିଫିକେଟ୍ ଯାହା ଏକ ନିର୍ଦ୍ଦିଷ୍ଟ ସ୍ଥାନୀୟ ଅଞ୍ଚଳ କିମ୍ବା ଏକ ନିର୍ଦ୍ଦିଷ୍ଟ ସ୍ଥାନର ଏକ ଉତ୍ପାଦ ଚିହ୍ନଟ କରିବା ପାଇଁ ବ୍ୟବହୃତ ହୁଏ । ଏହି ଟ୍ୟାଗ୍ ସେହି ସ୍ଥାନର ବିଶେଷତ୍ୱ, ବିଶେଷ ପରମ୍ପରା ଏବଂ ସ୍ଥାନୀୟ ବୈଶିଷ୍ଟ୍ୟକୁ ଦର୍ଶାଏ । ଜିଆଇ ଟ୍ୟାଗ୍ ଉତ୍ପାଦର ଗୁଣବତ୍ତା ଏବଂ ବୈଶିଷ୍ଟ୍ୟ ସୁନିଶ୍ଚିତ କରିବାରେ ସାହାଯ୍ୟ କରେ ଏବଂ ବଜାରରେ ଏହାର ସ୍ୱୀକୃତି ଏବଂ ସୁରକ୍ଷା ପ୍ରଦାନ କରେ | ବଜାରରେ ଅନୈତିକ ପ୍ରଚାର ଏବଂ ନକଲି ଦ୍ରବ୍ୟରୁ ରକ୍ଷା କରିବା ପାଇଁ ମଧ୍ୟ ଏହା ବ୍ୟବହୃତ ହୁଏ ।
