ଚାକିରି ଖାଇବ ଆର୍ଟିଫିସିଆଲ ଇଣ୍ଟେଲିଜେନ୍ସ : ୫ ବର୍ଷରେ ଲୋପ ପାଇବ ୧୪ ନିୟୁତ ଚାକିରି

 ଭୁବନେଶ୍ବର : ନିକଟରେ  ବିଶ୍ୱ ଅର୍ଥନୈତିକ ଫୋରମ ପକ୍ଷରୁ ପ୍ରକାଶିତ ଏକ ରିପୋର୍ଟ ରେ କୁହାଯାଇଛି ଯେ ଆଗାମୀ ୫ ବର୍ଷରେ ୧୪ ନିୟୁତ ଚାକିରି ସଙ୍କଟରେ ପଡିପାରେ । ଏହାର ମୁଖ୍ୟ କାରଣ ହେଉଛି ଆର୍ଟିଫିସିଆଲ ଇଣ୍ଟେଲିଜେନ୍ସ (Artificial Intelligence) । କରୋନା ମହାମାରୀ କାରଣରୁ ଦେଶ ତଥା ବିଶ୍ୱରେ କମ୍ପାନି ଓ ଲୋକଙ୍କ କାର୍ଯ୍ୟସ୍ଥିତିରେ ଅନେକ ପରିବର୍ତ୍ତନ ଆସିଛି। ରୁଷ୍ ଓ ୟୁକ୍ରେନ୍ ମଧ୍ୟରେ ଚାଲିଥିବା ଯୁଦ୍ଧ ବିଶ୍ୱ ଅର୍ଥନୀତି ଉପରେ ମଧ୍ୟ ବିଶେଷ ପ୍ରଭାବ ପକାଇଛି। ଏବେ ବିଶ୍ୱ ଅର୍ଥନୈତିକ ଫୋରମର ଏହି ରିପୋର୍ଟ ଚିନ୍ତାଜନକ ।

ବିଶ୍ୱ ଅର୍ଥନୈତିକ ଫୋରମ କହିଛି ଯେ ଆଗାମୀ ୫ ବର୍ଷ ରେ ଭାରତର ଚାକିରି ବଜାରରେ ୨୨ ପ୍ରତିଶତ ପର୍ଯ୍ୟନ୍ତ ଛଟେଇ ଦେଖାଯାଇପାରେ । କଂପାନିଗୁଡ଼ିକର କାର୍ଯ୍ୟରେ ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ମେସିନ୍ ଲର୍ଣ୍ଣିଂର ଭୂମିକା ବୃଦ୍ଧି ପାଇବାକୁ ଯାଉଛି ଏବଂ ୨୦୨୭ ମସିହା ପୂର୍ବରୁ ପ୍ରତି ୧୦ ଜଣଙ୍କ ମଧ୍ୟରୁ ୬ ଜଣଙ୍କୁ ସେମାନଙ୍କ ଦକ୍ଷତା ବୃଦ୍ଧି କରିବାକୁ ପଡ଼ିବ।

ବିଶ୍ୱ ଅର୍ଥନୈତିକ ଫୋରମ୍ ରିପୋର୍ଟରେ କୁହାଯାଇଛି ଯେ ବ୍ୟକ୍ତିଗତ କର୍ମଚାରୀଙ୍କ କ୍ଷେତ୍ରରେ ୪୪ ପ୍ରତିଶତ ଲୋକଙ୍କୁ ନିଜର ଦକ୍ଷତା ବୃଦ୍ଧି କରିବାକୁ ପଡ଼ିବ। ଇତିମଧ୍ୟରେ ଖବର ଆସୁଛି ଯେ ଆଇବିଏମ୍ ୭୮୦୦ ଚାକିରି ବଦଳରେ ଆର୍ଟିଫିସିଆଲ ଇଣ୍ଟେଲିଜେନ୍ସ କରିବାକୁ ନିଷ୍ପତ୍ତି ନେଇଛି। ଏହା ସହ ବିଶ୍ୱର ଅଗ୍ରଣୀ ଟେକ୍ କମ୍ପାନୀ ନୂଆ ନିଯୁକ୍ତି ଉପରେ ପ୍ରତିବନ୍ଧକ ଲଗାଇଛି ।

ଆଇବିଏମ୍ ର ସିଇଓ ଅରବିନ୍ଦ କ୍ରିଷ୍ଣା କହିଛନ୍ତି ଯେ କମ୍ପାନୀ ଏହାର ୩୦ ପ୍ରତିଶତ କର୍ମଚାରୀଙ୍କୁ ଆର୍ଟିଫିସିଆଲ ଇଣ୍ଟେଲିଜେନ୍ସ ରେ ବଦଳାଇବାକୁ ଚିନ୍ତା କରୁଛି। ସେ ସଙ୍କେତ ଦେଇଛନ୍ତି ଯେ ଆଇବିଏମ୍ ଆଗାମୀ କିଛି ଦିନ ପାଇଁ ନୂତନ ନିଯୁକ୍ତି ବନ୍ଦ କରିପାରେ।

ବିଶ୍ୱ ଅର୍ଥନୈତିକ ଫୋରମର ଚାକିରି ଉପରେ ନିକଟରେ ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ ୨୦୨୭ ସୁଦ୍ଧା ୮୩ ନିୟୁତ ପଦବୀ ଶେଷ ହେବ। ଆଗାମୀ ୫ ବର୍ଷରେ ୬୯ ନିୟୁତ ନୂଆ ନିଯୁକ୍ତି ସୃଷ୍ଟି ହେବ। ସେହି ଅନୁଯାୟୀ ଆର୍ଟିଫିସିଆଲ ଇଣ୍ଟେଲିଜେନ୍ସ ଓ ମେସିନ ଲର୍ଣ୍ଣିଂ ସହାୟତାରେ ୧୪ ନିୟୁତ ଚାକିରି ହ୍ରାସ ପାଇବ।