ନୂଆଦିଲ୍ଲୀ: ମଦ ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟି (ଆପ୍) ଆବାହକ ଅରବିନ୍ଦ କେଜ୍ରିଓ୍ଵାଲଙ୍କୁ ଶୁକ୍ରବାର ଗିରଫ କରିଛି ଏନଫୋର୍ସମେଣ୍ଟ ଡାଇରେକ୍ଟରେଟ ବା ଇଡି । ଏବେ ପ୍ରଶ୍ନ ଉଠୁଛି ମଦ ନୀତି ମାମଲାରେ ଅରବିନ୍ଦ କେଜ୍ରିୱାଲଙ୍କ ଭୂମିକା କ’ଣ ଥିଲା ଏବଂ ଇଡି କ’ଣ ଅଭିଯୋଗ ଆଣିଛି?
ନିକଟରେ ଇଡି ଏକ ପ୍ରେସ୍ ନୋଟ୍ ଜାରି କରି ବିଆରଏସ ନେତା କେ କବିତାଙ୍କୁ ମଦ ନୀତି ମାମଲାରେ ଷଡ଼ଯନ୍ତ୍ରକାରୀ ବୋଲି କହିଥିଲା। ଇଡି କହିଛି ଯେ କବିତା ଅରବିନ୍ଦ କେଜ୍ରିୱାଲ, ସଞ୍ଜୟ ସିଂ ଏବଂ ମନୀଷ ସିସୋଦିଆଙ୍କ ସହ ମିଶି ମଦ ନୀତିରେ ପରିବର୍ତ୍ତନ ଆଣିଥିଲେ ଏବଂ ପରେ ଏହାକୁ ନିଜ ଉପାୟରେ କାର୍ଯ୍ୟକାରୀ କରିଥିଲେ। ଏହା ବଦଳରେ ଦକ୍ଷିଣର ମଦ ଲବି ଆମ୍ ଆଦମୀ ପାର୍ଟିକୁ ଏକକାଳୀନ ୧୦୦ କୋଟି ଟଙ୍କା ଦେଇଥିଲା। ଏହାପରେ ମଦର ହୋଲସେଲ ବ୍ୟବସାୟରେ ୧୨ ପ୍ରତିଶତ କମିସନ ଗଠନ କରାଯାଇଥିବା ବେଳେ ସେଥିମଧ୍ୟରୁ ୬ ପ୍ରତିଶତ କୁ ଆପ୍ କୁ ଫେରାଇ ଦିଆଯାଇଥିଲା। କିଛି ଅଭିଯୁକ୍ତ ଓ ସାକ୍ଷୀଙ୍କ ବୟାନରେ କେଜ୍ରିୱାଲଙ୍କ ନାମ ରହିଛି। ଏଜେନ୍ସିମାନେ ସେମାନଙ୍କ ରିମାଣ୍ଡ ନୋଟ୍ ଏବଂ ଚାର୍ଜସିଟ୍ରେ ଏହା ଉଲ୍ଲେଖ କରିଛନ୍ତି।
ମଦ ନୀତିର ଅଭିଯୁକ୍ତ ବିଜୟ ନାୟାର ବାରମ୍ବାର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଆସୁଥିଲେ ଏବଂ ସେଠାରେ ଅଧିକାଂଶ ସମୟ ବିତାଉଥିଲେ। ସେ ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ସହ ବହୁତ କଥା ହେଉଥିଲେ। ବିଜୟ ନାୟାର ଅନେକ ମଦ ବ୍ୟବସାୟୀଙ୍କୁ କହିଥିଲେ ଯେ ସେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସହ ମଦ ନୀତି ବିଷୟରେ ଆଲୋଚନା କରିଛନ୍ତି। ବିଜୟ ନାୟାର ହିଁ ଅରବିନ୍ଦ କେଜ୍ରିୱାଲଙ୍କ ସହ ଇଣ୍ଡୋସ୍ପିରିଟ୍ ମାଲିକ ସମୀର ମହେନ୍ଦ୍ରୁଙ୍କୁ ପରିଚିତ କରାଇଥିଲେ। ବୈଠକ ସଫଳ ନ ହେବାରୁ ସେ ସମୀର ମହେନ୍ଦ୍ରୁ ଓ ଅରବିନ୍ଦ କେଜ୍ରିୱାଲଙ୍କୁ ତାଙ୍କ ଫୋନ୍ ରୁ ଫେସ୍ ଟାଇମ୍ ଆପ୍ ରେ ଭିଡିଓ କଲ୍ ଜରିଆରେ କଥା କରାଇଥିଲେ। କଥାବାର୍ତ୍ତାରେ ଅରବିନ୍ଦ କେଜ୍ରିୱାଲ କହିଛନ୍ତି ଯେ ବିଜୟ ନାୟାର ତାଙ୍କ ଲୋକ, ତାଙ୍କୁ ବିଶ୍ୱାସ କରନ୍ତୁ ଏବଂ ସହଯୋଗ କରନ୍ତୁ।