ହିଞ୍ଜିଳି: ୨୦୩୬ ସୁଦ୍ଧା ଓଡ଼ିଶାକୁ ଦେଶର ଏକ ନମ୍ବର ରାଜ୍ୟ ରେ ପରିଣତ କରିବାକୁ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆହ୍ବାନ ଦେଇଛନ୍ତି। ଏହା ହିଁ ତାଙ୍କ ସରକାରର ଅଙ୍ଗୀକାର ବୋଲି ନିଜ ନିର୍ବାଚନ ମଣ୍ଡଳୀ ଗଞ୍ଜାମ ଜିଲ୍ଲା ହିଞ୍ଜିଳିରୁ ଆନୁଷ୍ଠାନିକ ଭାବେ ନିର୍ବାଚନ ପ୍ରଚାର ଆରମ୍ଭ କରିବା ଅବସରରେ ସେ ଏହା କହିଛନ୍ତି।
୫-ଟି ରୂପାନ୍ତରଣ, ମହିଳା ସଶକ୍ତୀକରଣ, ଯୁବ ଉଦ୍ୟମ ପାଇଁ ଆବଣ୍ଟନ ଏବଂ ଦକ୍ଷତା ବିକାଶକୁ ପ୍ରୋତ୍ସାହିତ କରିବା ଉପରେ ଗୁରୁତ୍ୱ ଦେଇ ନବୀନ ବିଜେପିର ‘ଡବଲ ଇଞ୍ଜିନ୍’ ସରକାରଙ୍କ ସ୍ଲୋଗାନର ଜବାବରେ ପ୍ରସ୍ତୁତ ‘ଯୋଡ଼ି ଶଙ୍ଖ’ (ଉଭୟ ଲୋକସଭା ଓ ବିଧାନସଭା ପ୍ରାର୍ଥୀ)ଙ୍କ ପାଇଁ ଭୋଟ୍ ମାଗିଥିଲେ। ରାଜ୍ୟରେ 5ଟି ରୂପାନ୍ତରଣ ଜାରି ରହିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।
ବିଭିନ୍ନ ପ୍ରଗତିଶୀଳ ପ୍ରୟାସରେ ବାଧା ସୃଷ୍ଟି କରୁଥିବାରୁ ବିରୋଧୀ ଦଳଙ୍କୁ ସମାଲୋଚନା କରିଛନ୍ତି ବିଜେଡି ସୁପ୍ରିମୋ । ରାଜ୍ୟ ସରକାରଙ୍କ ପ୍ରତ୍ୟେକ ସକାରାତ୍ମକ ପଦକ୍ଷେପକୁ ନେଇ ବିରୋଧୀ ହୀନ ରାଜନୀତି କରୁଛନ୍ତି। ଓଡ଼ିଶାବାସୀ ସେମାନଙ୍କ ସୁବିଧାବାଦୀ ରାଜନୀତିକୁ ଖାରଜ କରିବା ସହ ଆଗାମୀ ନିର୍ବାଚନରେ ସେମାନଙ୍କୁ କଡ଼ା ଜବାବ ଦେବେ। ସେମାନେ ମନେ ରଖିବା ଉଚିତ ଯେ ବିକାଶମୂଳକ ପ୍ରୟାସକୁ ବିରୋଧ କରିବା ଦ୍ୱାରା କେବେ ବି ସଫଳତା ମିଳିନାହିଁ।
ଶ୍ରୀମନ୍ଦିର ପରିକ୍ରମା ପ୍ରକଳ୍ପ, ସମଲେଇ ଓ ଏକାମ୍ର ପ୍ରକଳ୍ପ ଅଧୀନରେ ବିଭିନ୍ନ ମନ୍ଦିରର ସୌନ୍ଦର୍ଯ୍ୟକରଣ ଓ ବିକାଶ ସମେତ ବିଜେଡି ସରକାରଙ୍କ ସଫଳତା ସମ୍ପର୍କରେ ଉଲ୍ଲେଖ କରି ସେ କହିଛନ୍ତି ଯେ ଓଡ଼ିଶାର ସାଢ଼େ ୪ କୋଟି ଲୋକ ତାଙ୍କ ପାଇଁ ଏକ ପରିବାର। ମୁଁ ରାଜ୍ୟବାସୀଙ୍କ ପାଇଁ କାମ କରୁଛି ଏବଂ ସେମାନଙ୍କ ସେବା ଜାରି ରଖିବି ବୋଲି ସେ କହିଛନ୍ତି। ହିଞ୍ଜିଳି ନିର୍ବାଚନ ମଣ୍ଡଳୀ ଦେଶ ପାଇଁ ଏକ ମଡେଲ । ଜିଲ୍ଲାର ତାରା ତାରିଣୀ ପୀଠରୁ ମନ୍ଦିର ବିକାଶ କାର୍ଯ୍ୟ ଆରମ୍ଭ ହୋଇଥିଲା।
