ସଂଦେଶଖାଲି ମାମଲାର ତଦନ୍ତ କରିପାରେ ଏନଆଇଏ, ସେଠାକୁ ଯିବାକୁ ବିଜେପି ନେତା ଶୁଭେନ୍ଦୁ ଅଧିକାରୀଙ୍କୁ ମିଳିଲା ଅନୁମତି

କୋଲକାତା-ସନ୍ଦେଶଖାଲି ମାମଲାରେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ପ୍ରାଥମିକ ତଦନ୍ତ ଆରମ୍ଭ କରିଛି। ଏହି ମାମଲାରେ ଖୁବ୍ ଶୀଘ୍ର ଏଫଆଇଆର ରୁଜୁ ହୋଇପାରେ ବୋଲି ମଙ୍ଗଳବାର (ଫେବ୍ରୁଆରି ୨୦, ୨୦୨୪) ସୂତ୍ରରୁ ସୂଚନା ମିଳିଛି। ବର୍ତ୍ତମାନ ତଦନ୍ତକାରୀ ସଂସ୍ଥା ଏହି ମାମଲାରେ ଅଭିଯୁକ୍ତ ଶାହାଜାହାନ ଶେଖଙ୍କୁ ଖୋଜୁଛି। ଅନ୍ୟପକ୍ଷରେ ଭାରତୀୟ ଜନତା ପାର୍ଟି (ବିଜେପି)ର ଶୁଭେନ୍ଦୁ ଅଧିକାରୀଙ୍କୁ କଲିକତା ହାଇକୋର୍ଟ ସନ୍ଦେଶଖାଲି ଯିବାକୁ ଅନୁମତି ଦେଇଛନ୍ତି। ଏହା ପୂର୍ବରୁ ପୁଲିସ ତାଙ୍କୁ ଯିବାକୁ ବାରଣ କରିବା ପରେ ସେ ଧାରଣାରେ ବସିଥିଲେ। ସନ୍ଦେଶଖାଲି ଯିବା ପୂର୍ବରୁ ସେ କହିଥିଲେ ଯେ ତାଙ୍କୁ ଯିବାରୁ ଅଟକାଯିବ କିନ୍ତୁ ହାଇକୋର୍ଟଙ୍କ ନିର୍ଦ୍ଦେଶ ପରେ ସେ ସେଠାକୁ ଯାଉଛନ୍ତି । ଯେତେବେଳେ ବୃନ୍ଦା କାରାତ କହିଛନ୍ତି- ଟିଏମସି ଗୁଣ୍ଡାଗିରି କରୁଛି। ମମତା ସରକାର ଏହି ଘଟଣାର କୌଣସି ତଦନ୍ତ କରୁନାହାନ୍ତି ଏବଂ ସେମାନେ ଏହି ଘଟଣାକୁ ନେଇ ଷଡ଼ଯନ୍ତ୍ର କରୁଛନ୍ତି।

ସେପଟେ ଜାତୀୟ ମହିଳା ଆୟୋଗ ଅଧ୍ୟକ୍ଷା ରେଖା ଶର୍ମା କହିଛନ୍ତି, ପୁଲିସର କାର୍ଯ୍ୟରେ ଅବହେଳା ରହିଛି। ମୁଁ ଡିଜିଙ୍କୁ ଭେଟିବାକୁ ଯାଉଛି, ଆସନ୍ତାକାଲି ମୁଁ ତାଙ୍କ ସହ ପୁଲିସର କାର୍ଯ୍ୟରେ ଅବହେଳା, ମହିଳାଙ୍କ ପ୍ରତି ସମର୍ଥନର ଅଭାବ ବିଷୟରେ କଥା ହେବି। ମୁଁ ରାସ୍ତାରେ ବୁଲୁଥିବା ବେଳେ ଏସପି ସାହେବ ଚେୟାରରେ ବସିଥିଲେ । ସେ ବୁଝିବାକୁ ଚାହାଁନ୍ତି ନାହିଁ ।

ଗତ ଫେବ୍ରୁଆରି ୯ ତାରିଖରୁ ସନ୍ଦେଶଖାଲିରେ ଏକ ବଡ଼ ଧରଣର ବିବାଦ ଦେଖାଦେଇଛି । ଏହି ଅଂଚଳରେ ଟିଏମସି ନେତା ଶାହାଜାହାନ ଶେଖର ଆଧିପତ୍ୟ ରହିଛି । ଜାନୁଆରୀ ୫ ରେ ରାସନ ଦୁର୍ନୀତି ମାମଲାରେ ଇଡି ଚଢ଼ାଉ ବେଳେ ଟିମ୍ ଉପରେ ଆକ୍ରମଣ ହେବା ପରଠାରୁ ଶାହାଜାହାନ ଶେଖ୍ ଫେରାର ଅଛି। ସେ ଫେରାର ହେବା ପରେ ସ୍ଥାନୀୟ ମହିଳାମାନେ ଫେବ୍ରୁଆରି ୮ ତାରିଖରୁ ଶାହାଜାହାନ ଶେଖ୍ ଓ ତା ସମର୍ଥକଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ ଆରମ୍ଭ କରିଥିଲେ। ମହିଳାମାନେ ଅଭିଯୋଗ କରିଛନ୍ତି ଯେ ଶାହାଜାହାନ ଶେଖ ଏବଂ ତା ଲୋକମାନେ ମଧ୍ୟ ମହିଳାମାନଙ୍କୁ ଅପହରଣ କରି ଯୌନ ଶୋଷଣ କରୁଥିଲେ। ଫେବ୍ରୁଆରି ୯ ତାରିଖରେ ବିକ୍ଷୋଭକାରୀ ମହିଳାମାନେ ଶାହଜାହାଁ ସମର୍ଥକ ହାଜରାର ୩ଟି କୁକୁଡ଼ା ଫାର୍ମରେ ନିଆଁ ଲଗାଇ ଦେଇଥିଲେ। ମହିଳାମାନେ ଦାବି କରିଛନ୍ତି ଯେ ତାହା  ସ୍ଥାନୀୟ ଗ୍ରାମବାସୀଙ୍କଠାରୁ ବଳପୂର୍ବକ ଛଡ଼ାଇ ନିଆଯାଇଥିବା ଜମିରେ ନିର୍ମିତ ହୋଇଥିଲା। ପଶ୍ଚିମବଙ୍ଗ ରାଜ୍ୟପାଳ ମଧ୍ୟ ଏଠାକୁ ଗସ୍ତ କରିବା ପରେ କହିଛନ୍ତି ଯେ ସନ୍ଦେଶଖାଲିରେ ସ୍ଥିତି ଅତ୍ୟନ୍ତ ଗମ୍ଭୀର।